CEPESMA

COORDINADORA PARA EL ESTUDIO Y PROTECCIÓN DE LAS ESPECIES MARINAS
LUARCA (PRINCIPADO DE ASTURIAS)

 

CASTELLANO     ASTURIANU     CATALÁ     GALEGO     NEDERLANDS     DEUTSCH     NORSK

 

CEPESMA, coordinadora pal estudiu y la proteición de les especies marines, creóse en 1996.

En 1998, CEPESMA abrió en L.luarca el "Aula del Mar", muséu que tien una esposición bien amplia d'animales marinos colos sos correspondientes paneles esplicativos: más de 400 exemplares d'especies estremaes ente les que se puen ver ocho de los calamares xigantes más grandes y meyor calteníos del mundu. Pente medies d'esta esposición, amás de con documentales y conferencies, quier dase a conocer l'ecosistema marín y mirar de sensibilizar a la población de la necesidá de conservalu, amosando les agresiones más comunes que faen que se vaiga estrozando pasu ente pasu.

Nestos años últimos más de 10.000 neños y rapazos participaron nes actividaes qu'entamó l'Aula.

L'Aula-Muséu ta abierta tolos díes.

CEPESMA completa'l so llabor d'educación medioambiental coles Esposiciones Itinerantes que fai per bona parte de la zona norte d'España.

CEPESMA xestiona tamién un Centru de Recuperación d'especies marines: foques, tortugues, aves, etc., y delles especies terrestres. Esti Centru, asitiáu a 4 km. de L.luarca, coles instalaciones amañoses pal tratamientu d'animales marinos, pudo facese gracies al patrociniu, ente otros, de CaxAstur, y a les ayudes concedíes pola Comunidá Europea al traviés del programa Leader. Y ye posible siguir calteniéndolu y ameyorándolu, amás de llevar alantre otros proyeutos de CEPESMA, gracies a los convenios firmaos esti añu 2001 col Gobiernu del Principáu d'Asturies, COGERSA y Parque Principáu, y gracies a la collaboración desinteresada d'otres entidaes privaes.

Un equipu formáu por veterinarios, biólogos y otros collaboradores, toos ellos voluntarios, ocúpense de tolos llabores qu'hai que facer nesti Centru. Llográronse bonos resultaos nel tratamientu y na vuelta depués al so hábitat de les especies recuperaes. Últimamente soltáronse seis foques grises y una foca capelluda nun estáu bien bonu. Ente los cetáceos que s'atoparon (toliñes, botos, etc.) na playa, CEPESMA salvó nueve exemplares hasta agora. Recoyéronse, tamién, más de dos centenares d'aves.

Amás, CEPESMA fai un bon trabayu na recuperación y na información de los varamientos qu'hai munches veces nes costes asturianes, en collaboración cola Universidá d'Uviéu.

 

Ún de los oxetivos fundamentales de CEPESMA ye'l de concienciar a la población, sobre manera a los neños, de la muncha importancia que tien caltener l'ecosistema marín. Pa mirar de llogralo, el primer pasu ye dar a conocer esi "mundu".